Rusties blits Noordwes Interhoër en skryf geskiedenis!
Rustenburg – Op Vrydag, 14 Februarie 2025, het die Noordwes Interhoër in Potchefstroom gebewe onder die ongekende spoed en krag van Hoërskool Rustenburg se atlete! Van die eerste fluitjie af het die Rusties met vasberadenheid en uitmuntende prestasies gewys dat hulle nie net deelneem nie, maar regeer.
Die Rusties het die kroon vir die tweede agtereenvolgende jaar gehou as algehele wenners, terwyl hulle agt splinternuwe rekords opgestel het! Dit was ‘n vertoning van atletiese briljantheid, waar talent en harde werk hand aan hand geloop het.
Een van die uitblinkers van die dag was Nathan van Staden, wat die gesogte Junior Victor Ludorum Veld-toekenning ontvang het en boonop as Beste Veldatleet bekroon is. JP Blignaut het nie op hom laat wag nie en het die titel van Senior Victor Ludorum Baan ingepalm. Hulle en hul spanmaats het gesorg dat die Rustenburgers met trots en selfvertroue oor die wenstreep is.
Hierdie oorwinning is nie net ‘n trofee in die kas nie; dit is ‘n bewys van die Rusties se verbintenis tot uitnemendheid. Baie geluk aan elke atleet, afrigter en ondersteuner — julle het gewys wat ware sportmanskap en deursettingsvermoë beteken!
Main photo: Van links: Atletiekkapteine en algehele wenners Mianke van der Merwe, Hoërskool Rustenburg se hoof Hennie Pieterse, en Waide Davies, stralend van trots na ‘n ongelooflike oorwinning.
