RHS eerste krieketspan maak naam 

Rustenburg - Die eerste krieketspan van Hoërskool Rustenburg (RHS) het op Sondag 16 Februarie teen Hoër Volkskool Potchefstroom (Volkies) deelgeneem aan die Finsbury-krieketreeks se finale rondte. Onder geweldige druk speel hierdie span steeds ‘n uitstekende wedstryd. 

Volkies het die loot gewen en gekies om eerste te kolf. RHS se veldwerk was puik en beperk Volkies met 87 lopies. Charl Naude boul eerste vir RHS met syfers van 16/0 in drie beurte en Rico Fryer sy vernoot - 25/2 in drie beurte. 

Hulle was afgelos deur Juan-Jacques Viljoen met 12/0 in sy enkelbeurt en Odirele Modimokwane met 12/3 in sy sewe beurte. Beste bouler van die dag was Brandon Venter met 5/21 in 6.3 beurte. 
Die span se kolfwerk was iets om oor huis toe te skryf met Werner Eckard: 11 en Odirele Modimokwane: 17 as die openingspaar. Daarna volg Nicklis van Onselen met 25, Tiaan van Tonder met 18, Charl Naude met 6 nie uit, en Rico Fryer met 6 nie uit. 

Hierdie span is vir die derde jaar in ‘n ry genooi om aan die Noord-suid T20 Top skole-kriekettoernooi deel te neem.